მიხეილ სააკაშვილი "გატაცებისთვის" სტრასბურგის სასამართლოში კომპენსაციას მოითხოვს

საქართველოს ყოფილი პრეზიდენტი და ოდესის ოლქის ყოფილი გუბერნატორი მიხეილ სააკაშვილი ევროპის ადამიანის უფლებათა სასამართლოს სარჩელით მიმართავს.

ამის შესახებ სააკაშვილმა დღევანდელ ბრიფინგზე განაცხადა.

მისი თქმით, ადვოკატები სტრასბურგის სასამართლოში მისი „გატაცებისთვის“ კომპენსაციას მოითხოვენ.

სააკაშვილმა აღნიშნა, რომ მისი გატაცების ფაქტი, უკრაინის სასამართლოს გადაწყვეტილებით დადასტურდა.

„სახლიდან გამიტაცეს, იძალადეს არა მარტო ჩემზე, არამედ ადამიანების ჯგუფზე. არც ერთი დოკუმენტი არ გააჩნდათ, რომელიც მათ ამის უფლებას მიანიჭებდა“, -განმარტა სააკაშვილმა.

ამასთან, ოპოზიციონერმა პოლიტიკოსმა უკრაინის უსაფრთხოების სამსახურში დაკითხვაზე მისვლაზე კვლავ უარი განაცხადა.

„უსაფრთხოების სამსახურს ჩემი ხმის ნიმუში სჭირდება ისტორიისთვის. ისეთ სიმღერას ვუმღერებ, რომ დიდხანს დაამხსოვრდებათ“, - აღნიშნა მიხეილ სააკაშვილმა.

5 დეკემბერს, უკრაინის უსაფრთხოების სამსახურმა მიხეილ სააკაშვილი სახლის სახურავზე დააკავა, თუმცა, პარტია „ახალი ძალების მოძრაობის“ აქტივისტებმა, რომლის ლიდერიც სააკაშვილია, ძალოვანი სტრუქტურების ავტომობილი არ გაატარეს და სააკაშვილის გათავისუფლება მოახერხეს.

8 დეკემბერს კი, სააკაშვილი წინასწარი დაკავების იზოლატორში მიანც მოათავსეს, თუმცა რაიონულმა სასამართლომ პოლიტიკოსი გაათავისუფლა.

სააკაშვილს ბრალად დანაშაულებრივი ჯგუფის მხარდაჭერა ედება.

უკრაინის გენერალური პროკურატურა მიიჩნევს, რომ სააკაშვილის მიერ კიევში ორგანიზებული აქციები, ექს-პრეზიდენტის ვიქტორ იანუკოვიჩის გარემოცვის, ბიზნესმენ სერგეი კურჩენკოს მიერ დაფინანსდა, თვითონ აქციები კი, სახელმწიფოებრივი წყობის დამხობას ემსახურება.